السبت، 5 مايو 2012

ڤالو عني رومية !!


راه جاني مرسول وڤالو عني رومية 
يا حسراه على الدنيا الفانيا المربوية 
بنت العربان ذِيك الحرة الديسية 
برهومية شان معلومة في أُمالِية 
معروفة بالخال والخلخال يا عينية 
تشرنينة وحده تلاڨي فرسان الصحرا تتغزل بية 
كحلة لرماش ، حنة تفحفح مابين جبال سالات وطواية 
ولات اليوم عيون الحساد تاكل فية 
شوف يا ميمون مادارو لحباب وقاشية 
ڤرب يا سامع وانصت لية 
أنحاكيك بصنعة يدية 
وأحكم بالحق ياك قدوة مافيه خطية ولاقصية
منصبة عليها براد التاي مجمر على الوڤيد ومعاه نعناع شوية 
والحديث ميحلاش بلا المقزل يدور مابين طبڤ وركبية 
صوفو يرڤاڤ منو خيط البرنوس وحتى الزربية 
هذا رڤم مزابي والأخر شلالي والخلالة تشهد علية 
حولي ، حصير ، ولا قشبية 
وماتزهاش خواطري بلا ما تڤعد وحدة مسامية 
واختار يا مختار غداك كسرة رقدة 
مطلوع ، فطير حتى الشواط مذابية 
الكل موجود ، هرماس وضلفة راعي لية 
مثرد رفيس ولا ڤصعة مسفوف طرطڤ حباته مابين سنية 
ولا حار شخشوخة ،عَيش سيدي ابراهيم الغول حن علية 
سرجي ديما محطوط عقاش ، مجبود ، فتلة 
من القل والقالة ،حتان عنابة القسمطيني داير حالة 
والشاوي بثرور ولحاف وزينو جبين تتباهى بيه الرجالة 
أرواح للنايلي مدور وڤصة راس من جلفة لقواط وشامة 
واذا هذا الكل ومتعلمتيش أرواحي نعطيك الكيفية 
راها الهيدورة مازالها بيضا ناصعة تحت رجلية 
حَمَّارة شكوة تستنى نطلع زبدتها برجة 
والڤربة منهيه فوڤها قبوشة
مدهونة بالمْهَل شربة منها باردة 
ياه اذا جات المواسم مڤدمة 
فريك ومرمز من بريواني الخنڤة بهذا عالمة 
من خزرة وحدة نعرف النعجة اذا وحيدة ولا متاومة 
قرداشي مايخطيش داري والناس تتقيزب بية 
وعلاه علية قاسية ومني حاقدة 
بجاه الصلاح والناس لملاح راني جيتك ناوية 
طفي ناري ولاتخلي حرڤة مشعالي ڤادية 
راه جفاني النوم والأحلام مني هاربة 
ياه يا ماري الباهية بعد كل هذا وڤالو رومية 
عن دينا وملتنا خارجة 
متبكيش يا قليبي اذا ڤالو رومية 
سعدي أنا بميمتي قرة عيني أنا بها زايخة 
بعد الإسلام ولات العصابة والصلاية 
بلسانها شادة وفي دعاها خاشعة 
هذا الكل وڤالو رومية 
امالا اذاكنت عربية 
كيفاش تكون لحوال دايرة ؟
حسبي محبة الله والرسول عليهم مْعَوْلة .
وتكفيني رضاية الوالدين تفتحلي لبواب المْسَكرة . !!

هناك 4 تعليقات:

  1. مساء الورد خديجة

    ابتسمت هنا لأن بعض المفردات لم أفهمها جيداً

    ولكن الفكرة بالتأكيد وصلت بشكل جميل زاد من

    روعتها القافية والنغمة الموسيقية ....

    تحياتي وإحترامي

    ردحذف
    الردود
    1. مساء الورد يا ريبال هلا وغلا فيك شرفت المدونة
      حقيقة هي مشاركة متواضعة في مسابقة الشعر العامي بملتقى المبدعين العرب
      الحمد لله انها عجبتك وانا تحت امرك في أي مفردة لم تفهمها لأنه شعر زجلي
      وأعتبره رسالة مني لبعض الزملاء الأدباء من عمق الشعر الملحون الجزائري للأفواه التي تتكلم في الفراغ
      دون أي وعي ولا منطق او مرجع ...تحيتي ومحبتي واحترامي .

      حذف
  2. أزال أحد مشرفي المدونة هذا التعليق.

    ردحذف

يسعدني جدا رأيكم بكتاباتي الأدبية ..امل في نقدكم البنّاء مع فائق احترامي