‏إظهار الرسائل ذات التسميات شعر العامية. إظهار كافة الرسائل
‏إظهار الرسائل ذات التسميات شعر العامية. إظهار كافة الرسائل

الأربعاء، 19 ديسمبر 2012

مكتــــــــــــــــــوبي .. !!


مكتــــــــــــــــــوبي ..

ماشي ..
عارفة نحفظ راسي ولا قرطاسي 
وكيفاش نداري 
دمعي وشحوب رماشي 
يا خاوية المْراكب هذا سرج تحواسي 
سلميه للغالي 
وقولي له عمري 
بلا الحبيب مايسواشي
شفِيت فية عداي 
وقلت ماشي 
يا اللي ركبت موجة الفوخ وغلطت ناسي 
باش تقابل الرحمن ولاراك ساهي 
عملت شي جبهات وحواشي
وتمرد دمك داخل عروقي 
هذا وليد كرشي 
ملقيتوش تايه في الفيافي
هزيت تسعة وحطيت بصراخي
ووجعة الضنا ما ضاقتها الا عارڨة النواصي
رفعتني الزحمات وقربتني 
خطوتين من مماتي 
وبإذن الله جاء لؤي ..
بخزرة وحدة طَفَى جمراتي 
وهبني الحياة وشتت اش نقاسي 
زادني قوة وحسسني 
بأمومتي يا صاحي 
هديته الفْضيلة وسلمته بنياني 
وبيه رافعة ساسي وعْلامي 
وحتى أوتادي
نفخر بيك يوم حسابي ونقول تعلم ربي
ربيتو على سنة النبـــــــــــــي وسيرة اجدادي 
واللي قدرته ورضيتولي 
كبر في العين وروحي 


وكــــــــــان كل مكتـــــــــــــــوبي .

السبت، 5 مايو 2012

ڤالو عني رومية !!


راه جاني مرسول وڤالو عني رومية 
يا حسراه على الدنيا الفانيا المربوية 
بنت العربان ذِيك الحرة الديسية 
برهومية شان معلومة في أُمالِية 
معروفة بالخال والخلخال يا عينية 
تشرنينة وحده تلاڨي فرسان الصحرا تتغزل بية 
كحلة لرماش ، حنة تفحفح مابين جبال سالات وطواية 
ولات اليوم عيون الحساد تاكل فية 
شوف يا ميمون مادارو لحباب وقاشية 
ڤرب يا سامع وانصت لية 
أنحاكيك بصنعة يدية 
وأحكم بالحق ياك قدوة مافيه خطية ولاقصية
منصبة عليها براد التاي مجمر على الوڤيد ومعاه نعناع شوية 
والحديث ميحلاش بلا المقزل يدور مابين طبڤ وركبية 
صوفو يرڤاڤ منو خيط البرنوس وحتى الزربية 
هذا رڤم مزابي والأخر شلالي والخلالة تشهد علية 
حولي ، حصير ، ولا قشبية 
وماتزهاش خواطري بلا ما تڤعد وحدة مسامية 
واختار يا مختار غداك كسرة رقدة 
مطلوع ، فطير حتى الشواط مذابية 
الكل موجود ، هرماس وضلفة راعي لية 
مثرد رفيس ولا ڤصعة مسفوف طرطڤ حباته مابين سنية 
ولا حار شخشوخة ،عَيش سيدي ابراهيم الغول حن علية 
سرجي ديما محطوط عقاش ، مجبود ، فتلة 
من القل والقالة ،حتان عنابة القسمطيني داير حالة 
والشاوي بثرور ولحاف وزينو جبين تتباهى بيه الرجالة 
أرواح للنايلي مدور وڤصة راس من جلفة لقواط وشامة 
واذا هذا الكل ومتعلمتيش أرواحي نعطيك الكيفية 
راها الهيدورة مازالها بيضا ناصعة تحت رجلية 
حَمَّارة شكوة تستنى نطلع زبدتها برجة 
والڤربة منهيه فوڤها قبوشة
مدهونة بالمْهَل شربة منها باردة 
ياه اذا جات المواسم مڤدمة 
فريك ومرمز من بريواني الخنڤة بهذا عالمة 
من خزرة وحدة نعرف النعجة اذا وحيدة ولا متاومة 
قرداشي مايخطيش داري والناس تتقيزب بية 
وعلاه علية قاسية ومني حاقدة 
بجاه الصلاح والناس لملاح راني جيتك ناوية 
طفي ناري ولاتخلي حرڤة مشعالي ڤادية 
راه جفاني النوم والأحلام مني هاربة 
ياه يا ماري الباهية بعد كل هذا وڤالو رومية 
عن دينا وملتنا خارجة 
متبكيش يا قليبي اذا ڤالو رومية 
سعدي أنا بميمتي قرة عيني أنا بها زايخة 
بعد الإسلام ولات العصابة والصلاية 
بلسانها شادة وفي دعاها خاشعة 
هذا الكل وڤالو رومية 
امالا اذاكنت عربية 
كيفاش تكون لحوال دايرة ؟
حسبي محبة الله والرسول عليهم مْعَوْلة .
وتكفيني رضاية الوالدين تفتحلي لبواب المْسَكرة . !!

الجمعة، 13 أبريل 2012

وين ؟




وين لقياك
يا مضنوني 
رحت وخليت القلب مڤواه 
شاخ البال وزاد القهر أكساه 
تايهة ومالقيت شفاه 
ضيعت غزالي 
ونسيت رحالي 
ياه ..يآ أيامي 
وعلاه شاب راسي في تهواسي 
وراحتي نسيتها في كفوف سجاني 
راح ...
ودا معاه كل أحلامي 
خلالي الظلامي 
وڤايدة ناري 
وحمامة بيضاء تفرفر فيماقدامي 
ماعرفت نطيرها ولا نهَديها 
الكل غاب 
وبق الغاب 
يلعن في سمايا
 ويستنى رضايا 
وانا مهدود حالي 
معرفت ننساك
ولا نستناك 
آش قولك يا سامع كلامي 
بحال قُدوة يضوى نهاري 
ولا نمد يدي ونشري كفني 
ونستنى ما بقالي ؟ !!
الله ...الله 
عليك يا بايعني 
ومبدل دم شقاي 
في شقوة صبية 
همهما تاخذ مالاق بية 
وترميني عظمة في البراري
تاكلني ذياب الصحاري . !!

السبت، 25 فبراير 2012

مصر



عاود الربيع دارنا 
جا وجاب معاه 
الحراير ، الرجال ..
دمها ثاير شدايد 
زحفت من
شمالها لجنوبها
 جواد خيال..
شاقين الطريق
 براية النصر 
وبإذن الله
 شعارها النضال ..
صداها ضرب
 في كف الميزان
وخرج الظلم 
من فم المحال..
لوقالو:
 وين الجمال مرآه
نقولهم:
 يا قاصد النيل 
روح شوف محلآ سخاه ..
شفت الأصل
 في الشجرة والحجرة
نهرو ثاير في حماه ..
يا زاير لأم الدنيا
 بلاغ سلامي للحاير
وقولو:
 القلب والرب معاه ..
وبإذن الله
مصر في يد أمينة 
حاميها هم شبابها 
مكتوبين في سماه .

الخميس، 26 يناير 2012

وعلاش يا الأيام




وعلاش يا الأيام 
الوين رايحة ومسيبتني وماشيا 
وينك البارح بركي كنت معايا زاهيا 
نرقصو ونغنو بخواطر ذيك العويتقا 
قربي وساميني وأقعدي بحذايا 
فرجي وماتروحي عني يا الزايخا 
ياك قربك فيه الروح والخواطر تبقَ مهنيا 
وعلاش يا الأيام 
منين تروحي عني نهمل ومايبقَ في العقل غير التهوال 
بالله عليك يا المزيانة ماتنسايش الحب اللي في قلبي 
راه معبي غير خير والسْلام لكل خياني
وعلاش يا الأيام
البارح كنت ذيك الطفلة المتهنيا 
واليوم الحال شاهد عليه ربي 
النوم رحل عليا وخلآ جمرة ما تطفيها غير الأعمار 
بالله عليك ولي لِيا وردي عمري اللي رحل من زمان 
راني نمشي وأنا مغمضة وراني خايفة في غربتي 
يا لحنينا حني شويا وماتخلينا معلقا 
وعلاش يا الأيام 
رآه القلب موجوع والغربة زادت عذابي 
حشمتك بالغالي أخزريني بعين المحبوب 
فرجي همي وطفي ناري يا لالة يا لعزيزآ 
جيتك نترجئ ونتوسلك شوفي لي وأنصريني على من عداني 
ياك راني مانعرف غير الحوايج الباهيا 
يا حبيتي يا أيامي جيتك من كل باب وطبطبت بالله حني عليا 
وعلاش يا الأيام 
البارح حنيت بحنة مرشوشة بماء الزهر . 
وفي وسطها حطيت ذيك اللويزة اللي متباهية باللون الذهبيا 
شديتها بيدي وأنا فرحانة باللون الوردي
وعلاش يا الأيام  
خنقتي ماريا وخليتيها تتخبط في المحاين 
ياك أنا نبغيك وأنتي وحدك هاربا عليا 
يا الزينة لا...لا تروحي وتخلي عيني تنوح 
ترحلي بلا ماتخبريني ياك هذا حقي 
والله الحرام يخي ساهل بصح كل من خاف الله يبعد عنوا
طلي عليا بلي يرضي ربي وبعدي عني شماتة العديان 
وعلاش يا الأيام 
شفت كي الطالب كي الطبيب مالقيت حل 
الوين..؟ الوين رايحة ومخليتني في همومي غارقا 
رآه صبري طال و راني خايفة يجي النهار اللي يحبس قلبي ونبقا ذيك المرفلآ 
وعلاش يا الأيام 
تسمعي لي اللي ساحرني راني شكيتك للخالق العالي 
أش نقولك الصبر هو دوايا 
ونخلي ربي هو اللي يهز الضر 
راهي دموعي زرآبة نعاني بصح ديري في بالك بلي مانموتش 
اللي مقدر راني قابلاتوآ 
بصح يومك راهو جاي ماتقوليش ربي راه غافل عنا وآا

بِ الله أعْلِيْكْ يَآ حْمَامِيْ !!




أشْ بْلآكْ ؟؟






جَانِي الليل وجَابْ أهْوَالُو ...
يآللي شاغَل البَال أشْ دَارُو فِيها عُزَالُو !!

الخميس، 19 يناير 2012

حبيتك !!








أنا حبيتك في كل زمان ...ووهبتك حياتي قصيدة تتلوها الأجيال 
يا غايب عن عيني... قلبي راه في تَهْوال 
سلمتك الدنيا وكل مافيها ...وقلت غيرك مُحَال 
ينصفني من حُرقة الظُلاَّم....ونرضاه لي عْدُول
كيفاه تخون اليوم وتزيد بقهري مرارة... من غير سُؤَال 
ظنيتك تكون لي... سلطان وتجيني اليوم سَوَال 
لآ حاقد رامي على همومي الأثقال...هديت أكتافي ومزقت كل الآمال 
وإذا حبيت ترحل، أرحل بلا... ماتلقى حجج تخليك الطيح من البال 
خليك في الصورة ...ديما الفارس الخَيَّال 
اللي تهابو العين... في كل إقبال 
وصدى صوته تنادي ...بيه لَجْبّال !!


Douja Bénadel 

بالله عليك !!




كيفاش أنخليك يا الغالي 
وحبي هو بين أيديك حكاية 
شملت فيه الحاير والمليح من كل ديرة 
سكنت القلب من عهد قديم بزاف 
يلا أرواح بلآك من الزعاف 
راهي محبتك قوية وغواية 
وأنت طبيبي ودوايا 
هوايا وكل مُنايا 
يا مضنوني علتي كبيرة 
وحياتي دونك عذاب وشفايا 
أش داك تطرق بوابي في الأول 
واليوم جاي وحاب ترحل 
كيفاش تنهي حياتي بجرة قلم 
وتقول هذا اللي بيه أنا متكلم 
ماعادت فارقة معاك 
وأنا وهبت سنين عمري ليك في الحلالي 
أش داني نفنى في حبك 
حتان هشمت مشعالي 
واذا حاب ترحل ..أرحل 
لكن ماذا بيك تجي وتقعد أقبالي 
واذا فية عيوب وريهالي 
متخلينيش نرفع ونحط في سؤالي 
بالله عليك سمطت علية أيامي وزدت في تهوالي 
هذا المرسم تركتو من وراك خالي 
ومفتاح قلبي خليتو عندك أمانة 
خليه بين عينيك ديما في العلالي !




Douja Bénadel